Dard kya hota hai,
Ye koi us maa se pucho,
Jisne apna beta khoya hai
Jiska mamta ka aanchal,
Subak subak ke roya hai.

Dard kya hota hai,
Ye koi us patni se pucho,
Jisne apna pati khoya hai
Jiske pyaar ke khet m,
Dukh ka beej boya hai.

Dard kya hota hai,
Ye koi us bacche se pucho,
Jisne apna pita khoya hai
Jiske intezaar m vo baccha,
Har raat bechaini se soya hai.

Dard kya hota hai,
Ye koi us ladki se pucho,
Jisne apna pyaar khoya hai
Jiske saath umar guzaarni thi,
Uska gam kacchi umar m dhoya hai.

Dard kya hota hai,
Ye koi us behen se pucho,
Jisne apna bhai khoya hai
Jisne apna har rakshabandhan,
Pal Pal intezar se piroya hai.

Dard kya hota hai,
Ye koi mere desh se pucho
Jisne apna veer jawan khoya hai,
Jo gaya to tha is mitti ki raksha karne,
Lekin aj usi ka shav is mitti m samoyaa hai.

– PALAK JATWANI

Platform:-SPLIT POETRY INDIA

Editor:-Gautam Jha